ឃាតកម្មដ៏កក្រើកកាលពីម្សិលមិញ បានបន្សល់ទុកព័ត៌មានជាច្រើន ហើយឥឡូវនេះក៏ទើបបែកធ្លាយរឿងមួយចំនួនទៀត ដែលខុសពីប្រិយមិត្តបានដឹងពីមុនមក។ តាមពិត អតីតប្ដីរបស់តារាចម្រៀង សាន ស្រីឡៃ មានឈ្មោះពិត ខៀវ ម៉ៅ អាយុទើប ៤៧ឆ្នាំប៉ុណ្ណោះ។
បើតាមព័ត៌មានចុងក្រោយដែលទើបទទួលបាន គឺអតីតប្ដីរបស់តារាចម្រៀង និងជាអតីតបេក្ខនារីក្នុងកម្មវិធី The Voice Cambodia មិនមែនមានឈ្មោះ ជ័យ រិន នោះទេ គឺមានឈ្មោះពិត ខៀវ ម៉ៅ។ ចំណែកឈ្មោះ ជ័យ រិន នោះទិញពីគេពេលចូលធ្វើគយ។ ចំណែកអាយុពិត ទើប ៤៧ឆ្នាំប៉ុណ្ណោះ មិនមែន ៥៣ឆ្នាំ ដូចព័ត៌មាននានចុះផ្សាយកន្លងមកទេ។
តាមប្រភពគួរឲ្យទុកចិត្ត គឺ ខៀវ ម៉ៅ បច្ចុប្បន្ន ជាជំនួយការសាខាគយខេត្តកំពង់ចាម មិនមែនជាអនុប្រធានសាខាគយខេត្តត្បូងឃ្មុំទេ។ មន្រ្តីគយរូបនេះ ធ្លាប់បំពេញការងារជាច្រើនកន្លែង ដូចជាខេត្តព្រះសីហនុ ក្រុងប៉ោយប៉ែត និងខេត្តបន្ទាយមានជ័យ។ មូលហេតុនេះហើយ ទើបលោក ខៀវ ម៉ៅ បានជួបជាមួយ សាន ស្រីឡៃ បង្កាត់ភ្លើងស្នេហ៍ បានកូន ២នាក់ ទាំងមានប្រពន្ធនៅស្រុកកំណើតឯខេត្តព្រៃវែងទៅហើយ។
បើតាមប្រភពដដែល បានឲ្យដឹងថា ប្រពន្ធស្របច្បាប់របស់លោក ខៀវ ម៉ៅ នៅស្រុកព្រះស្ដេច ខេត្តព្រៃវែង មានកូន ៤នាក់រួមគ្នា។ ដោយសារបែបនេះហើយ ទើបសពរបស់លោក ខៀវ ម៉ៅ ត្រូវយកទៅបូជា នៅឯខេត្តព្រៃវែង ខណៈសពរបស់ សាន ស្រីឡៃ តម្កល់ធ្វើបុណ្យនៅភ្នំពេញ បែកពីគ្នា។
ចំពោះប្រវត្តិរបស់ស្រីឡៃ គឺនាងជាអ្នកចូលចិត្តចម្រៀងតាំងពីតូចមកម្ល៉េះ ដោយតែងតែទៅណាមកណា ច្រៀងរហូត។ ពេលធំពេញវ័យ នាងក៏បានសម្រេចយកឈ្មោះ រិន ជាស្វាមី ប៉ុន្តែមិនបានរៀបចំមង្គលការធំឡើយ ពោលគឺត្រឹមតែសែន ចាស់ទុំដឹងបន្ដិចបន្ដួច។ ក្រោយពីរួមរស់ជាមួយគ្នាបានកូនប្រុស២នាក់ ម្នាក់អាយុ៨ឆ្នាំ និងម្នាក់អាយុ៤ឆ្នាំមក នាងក៏បានដឹងថាប្ដីរបស់ខ្លួនធ្លាប់មានប្រពន្ធទៅហើយ ហើយមានកូនដល់ទៅ៤នាក់ទៀត។ ដោយសារតែប្ដីខ្លួនមួយជិះទូក២ ដូច្នេះហើយ ទើបនាងសម្រេចចិត្តថាបែកគ្នាជាមួយប្ដីតែម្ដងទៅ ព្រោះនាងតែងតែទទួលរងហិង្សាពីប្ដីម្នាក់នេះជាញឹកញាប់។
ហេតុផលមួយទៀតដែល ស្រីឡៃ ប្រកាសចែកផ្លូវជាមួយប្ដី ព្រោះនាងមិនចង់មានឈ្មោះជាមនុស្សស្រីដណ្ដើមប្ដីគេឡើយ ក្រោយពីដឹងថា ជ័យ រិន មានប្រពន្ធហើយនោះ។ តែអ្វីគ្រប់យ៉ាងមិនបានដាច់ស្រេចឡើយ ត្បិតអីខាងប្រុសមិនព្រមលែងលះ ដោយគ្រាន់តែអាចនៅផ្ទះបែកគ្នាប៉ុណ្ណោះ។ ស្រីឡៃ ទទួលរងការងារធ្ងន់មែនទែនក្នុងការមើលថែកូននេះ ពោលគឺត្រូវទៅច្រៀងដើម្បីយកលុយមកឱ្យម្ដាយ និងចិញ្ចឹមកូនទាំងពីរ។
ដោយសារតែមួយរយៈនេះស្រីឡៃ ឡើងកោតបន្ដិច ប្ដីក៏មកសុំត្រូវគ្នាវិញ ក្រោមហេតុផលជាច្រើនយ៉ាង ប៉ុន្តែធ្វើមិចបើស្រីឡៃ ដាច់ចិត្តទៅហើយ ក៏មិនព្រមត្រូវគ្នាវិញឡើយ។ ហេតុដូច្នេះហើយ ទើបបានជាខាងប្ដីខឹង និងកើតជារឿងអាក្រក់បាញ់សម្លាប់គ្នាឡើងមក។
សូមបញ្ជាក់ថាក្រោយពីប្រលងចប់ The Voice Cambodia មក នាងបានសន្សំលុយទិញបានផ្ទះមួយដើម្បីរស់នៅ ប៉ុន្តែដោយសារបន្ទុកគ្រួសារធ្ងន់ពេក ទើបនាងសម្រេចលក់ផ្ទះនោះវិញ ហើយមកជួលផ្ទះគេរស់នៅ នៅខណ្ឌសែនសុខ៕
Comments
Post a Comment